Ordain Sunna | KTZ

Upa BSK Tungnung, Phamta Subedar Khamkhual Buansing leh Phamta Nu Mankhoching te nupa goutan tate 12na October 6, 1960 in Bungmual khua ah piang hi.

Siamsinna leh Nasepna: 1976 in Donbosco High School apan Manipur Board nuai ah HSLC pass a, 1978-1980 sung Diploma in Civil Engineering, Government Polytechnic Imphal ah zou hi. 1082 in PHED nuai ah Section Officer Grade 1 sem pan a, 2015 in Assistant Engineer in kaisang hi.

Saptuam leh Khotang a kizatna: Upa BSK Tungnung, Biakna leh Phatna a lunglut mahmah Pathian mizat ahi. Ahihna lam peuh ah phatuamngaihna hau leh kipumpiak mi ahi. BYF leh BCD ah member hi gige, chairman leh secretary khawng in leng pang a, Division level ah leng dinmun nei in kizang mahmah hi. December 7, 2008 in Upa Ordainna tang hi. EBCC Bungmual ading in khuam muanhuai leh poimoh mahmah, TBSUC ah Finance Secretary thazohtak in pua a, GBC ah leng Patron member ahi. Khotang ah leng phatuam ngaihna hau, Bungmual Unit YPA, BYC ah President in hun sawtpi pang hi.

Damlouhna: Kum 2017 in Brain tumor ziak in Doctor tuamtuam naih in na kiensak zel hi. Mihing lama hihtheihtawp suah ahihnung in Pathian hunseh hong tung a, March 28, 2019 in a it mahmah inkuante leh saptuamte paisan in thupina gam ah ana pai masa hi. Pathian in a inkuante khamuan in ompih zel hen.


Pastor Vungbel, Pu Khamvai leh Pi Chingning te nupa kal a goutan masapen, July 11, 1923 in Selam khua ah piang hi. Selam khua a kipan Teikhang a pem in, September 15, 1943 in Pastor Siamhnun khut ah baptisma tang hi. A zi Khawingai toh August 13, 1950 in Pastor Siamhnun khut ah Saptuam Dansiangthou in kiteng uhi. Toupa apan goutan, tapa 5 leh tanu 3 nei ua, tuin a tate 3 in thupina gam ah hon paisanta uhi.

January 9, 1966 in MCC (tua EBC hita) Kumsim Khawmpi, Hiangtam Lamka ah Pastor Goukholian khut tungtawn in Upa Ordain sang a, January 18, 1980 EBC Kumsim Khawmpi ah Rev. Nengzachin khut tungtawn in Pastor Ordination ana sang hi. Pastor Vungbel ahihleh, Pathian leh Saptuam adia mi kizang mahmah, leitung siamsinna ah gentham om kei mahleh, theih bang tawk a Pathian adia kizang ut mi ahi. Teikhang, Hiangmun leh Lenglakawt a Saptuam phutkhetute lak a makai muanhuai khat ahi. Pastor ahih sung in Teikhang, Vaikhotlang leh Kawlbem Saptuamte ana kem kha hi. December 12, 2000 kum in Pastor a sepna apan Pension ta hi. A pension nung in leng Tualsung Saptuam ah ahih theih bangtawk in, Toupa gam nasepna ah kizang den hi.

December 2018 a kipan damlouhna ziak a lupna ngak in, pawpawtzou nawnlou in om hi. Huchia, hatlouhna leh natna tuamtuam nei a omlai in, kep theihtawk in kikem mahleh, February 17, 2019, zinglam dak 10:20 in A na a sep Toupa kiang a khawl tawldamta ding in honna paisanta hi. A it mahmah EBCC Teikhang a saptuamten ittak leh khelahtak kawm in, Pastor K. Paulianmung tungtawn in vuiliam in om hi. A paisan inkuanpihte leh Saptuamte Toupa’n khamuan in ompih den ta hen.


Pu Semzakham leh Pi Donnem-te’ nupa apan Toupa vualzawlna gil a gah goutan 5 a neihte uh lak a 3na Upa S Nengkhogin 1953 kum in Palkhuang, Thanlon Division ah piang hi. 1970 kum in baptisma tang a, August 29, 1972 in a zi Chiinzam toh Saptuam Dansiangthou in ECC Palkhuang ah Pastor Lamgin in ana kitengsak hi. Amau nupa in Pathian apan gil a gah vualzawlna, tapa 3 leh tanu 3 nei in, Palkhuang ah hun sawttak khosa uhi. Upa S Nengkhogin tulel a EBCC Kolkata a sem Pastor S Khamzalam pianna pa ahi.

A pian apan singtang a khosa, khut nasep a nekzong ahihna toh kiton in, nasep kuhkal leh taima mahmah mi ahi. January 15, 1981 in EBC Khawmpilian ah Upa Ordination Pastor Liankhosiam tungtawn in ana sang hi. Kum 2006 in Vengnuam, New Lamka ah pemlut in, a sih dong in hiai mun ah khosa hi.

Saptuam a a kizat khaknate: EBCC Palkhuang ah Local Chairman leh Secretary in hun sawttak ana pang kha hi. Thanlon Division ah DWC leh DMC te ah member in ana pangsek hi. EBCC Vengnuam ah Naupang Nipini Skul sinsaktu a kum 2 vel apan ban ah, a sihni tan in Bialtu Upa Leader in gin-omtak in ana pang den hi.

Salam leh Khalam a a nasepnate nusia in, January 24, 2019 nitak dak 6:40 in a it leh ngaihte leh Saptuamte nusia in a muan Toupa kiang ah hon khawlsanta hi. A inkuante i sunpih mahmah a, Toupa khamuanna i ngetsak hi.


CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2020 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia