Ordain Sunna | KTZ

Upa Kamdong s/o K Hangthuam 1942 kum in Kaihlam khua ah piang hi. January 24,1960 kum in Pastor H Thualkhothang khut ah baptisma tang hi. A zi Thangkhoning d/o Vungzaneng Hangzo toh April 7, 1964 in saptuam dan siangthou in Pastor H Thualkhothang in kiteng sak hi.

Kaihlam khua a omlai in Local Chairman a na len kha ngei a, Division level ah 2001 -2002 sung Singngat Division DWC member in pang hi. 2008 in tua a tenna Kanan Veng New Lamka ah pemlut hi. EBCC Kanan ah 2010 in Local Chairman in pang hi. 2012 kum in Upa Pahtakna Lai sang hi. March 2, 2020 ni in a it mahmah a inkuante leh a kep saptuamte nusia in hon paisanta hi. Toupan a inkuante khamuan in ompih zel hen.


Upa. Haulemthang Gualnam, phamta Pu Enthang Gualnam leh Pi Ngulniang-te apan goutan 8 lak a nautum ahi. Feb 25, 1970 in Vungbuk khua ah piang hi. Kum 1993 in EBCC Vungbuk ah a zi Vungzuankim toh Pastor S Jamchinpau khut ah, Saptuam dan siangthou in kiteng ua, goutan tapa-2 nei uhi.

A nekzonna Carpentry nasem a khosa ahi. Dec. 1999 in Itanagar, Arunachal Pradesh ah lut in Carpentry Workshop khat hong in khosa uhi. EBCC Itanagar saptuam ah kizang pah in, kum 2005 a Upa dia telching ahih a kipan a sihni tan dong Local Chairman in pang hi. Itanagar Biakin mun ding hong lemtan nawnlouh a kipan amah tenna inn pansan in kikhopna nei touzel uhi.

Feb 25 a piang himahleh, Saptuamte kim ding a deih ziakin Feb 23 (Sunday) in a birthday lopna (advance) bawl in saptuamte toh kipak tak in ankuang umkhawm uhi. Himahleh a nitak in taksa hatlouhna tuamtuam a neih sungna, zunkhum leh piles ziak a doctor kikem sakzel ahihna ah, om nuamlou sa in a zanzan in damdawi in zuan ngal uhi. A awmsung a kipan tuikhaih khiaksak in treatment bawl touzel mahle uh, nak haksa honsa in doctor ten a hih theih tawpsuah mahleuh Feb 25, 2020 (a pianni geih) dak 6:15pm in a it mahmah a zi leh tate leh a kep saptuamte nusia in thupina gam ah hon paisan hi.

Amah bei toh kituak in Itanagar saptuamte, KWS apan unaute, NERIST a sinlai Eimi Christian Fellowship leh Dhemaji field a kipan i missionary-te toh zan khovak in tutpih uhi. EBCC Tangnuam LSD a vui ding in a luang puakkhiak ahi a, Lampi ah EBCC Dimapur, EBCC Kohima leh Upa T Kaithang-te nupa in thupitak in na dawn uhi. EBCC Tangnuam in Upa Ordain khat ahihna bang in khotual mite hamphatna teng tangsak kawm in vuina programme neihpih uhi.


Upa Pausing Hauzel leh Pi Vungnem kal a goutan UPA H. NGULSIAM, March 27, 1930 in Phaitong khua ah piang hi. Amau unau pasal 8 leh numei 3 lak a 2na ahi. Amah mi thanuam, kipaktheimi, maitai, itna leh phatuamngaihna hau leh a hoihlam a kipumpiak mi a hi.

LAISIMNA LEH NASEP: Khajang ah [email protected] 2 tan sim in 1934 in Sialbu ah pem ua, 1947 kum in Bungmual ah pem in tuni tan teng uhi. March 18, 1949 in Sepaih (2nd Assam Regt.) ah lut in 1959 in Reserved Pension hi. 1960 in China gal dou ding a sapkik a om in tomkha va pang nawn hi. Kum 1955 in Pi Nengluan toh Saptuam Dan Siangthou in Bungmual ah kiteng ua, Tapa 4 leh Tanu 6 nei hi

A KIZATNATE: Pathian it a ngaina, zingkal baihtak a Devotion a Biakinn hoh gige mi, Sawm-a-khat leh Thilpiak tuamtuam ah a ginom. A damliai leh Biakin kai thulh ngeilou hi.1992 in EBC Khawmpi Lian ah Upa Orden tang hi, 2000 in Pahtakna Lai sang hi. A hat nawnlouh nung nangawn in Bible keng in Biakinn naih teitei a, April 21, 2019 (Nipini) tuh a Biakin muhtawp ni a hi maimah hi. Nasep hoih a kipumpiak mi ahih dungzui in Khawtang Pawlpi tuamtuam apan in Pahtawina, Award leh Kipahna Thilpiak tuamtuam dong hi.

A HUN NANUNG: April 28, 2019 in insung a kipuk in pawtkhe zou nawnlou a innmun a kep in a om a, natna tuamtuam in hon behlap in hatlouh lam hon manoh huaihuai a a om nung in December 16, 2019, nitak 11:00pm in a it leh ngaihte nusia in Toupa’ kiang hon khawl santa hi. December 17, 2019 in Saptuam in Sunna leh zahna hun a kineih zoh in, Itna leh ngaihnatna toh Bungmual Hanmual ah G. Thangsanglian, Local Pastor in vuina nei in Belampu muanhuai khat kikha liamta mai hi! Toupa’n akep Saptuam leh Insung mite khamuan in ompih hen!


Page 1 of 11

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2020 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia