Editorial

TUAILAI HINKHUA A PATHIAN POMTAK BIAK PIAKNA

“…kithoihna hing, siangthou leh Pathian lungtuak ding a na sapum uh lan di’n kon ngen ahi, huai na biakna dan ding him uh ahi.” [Rm. 12:1].

Thupatna: Tuailai hun a Pathian pomtak biak piakna hinkhua neih theihna dia a kibulphuhna (Foundation) poimoh pente lak a khat “Hinkho Siangthou” ahi. Thukhun Lui hun apan leh tuhun (Post Modern) tanpha a Khristian Tuailaite adia poimoh hi den hi. Huaiziak in, Tuailai hun a Pathian pomtak biak piakna neihna dia Hinkho siangthou neih a poimohdan leh manphatdan tamlou kikum lehang chi i hi.

Khatna: Tuailai leh Lawmngaih (Youth and Dating) Hinkhua a sianthouna: Lawmngaih neih (Dating) tuailaite hinkhua ahi a, Khristian huai tak a neih theih ahi a, Khristian huai lou tak a leng neih theih ahi. Pathian tate bel Khristian huai tak a Lawmngaih neih ding Pathian hon lametdan ahihman in, pilvanna ding tampi om hi. Pathian in Lawmngaih neih leh kitenna ding ah na hinkhua ah tup poimoh tak leh a deihdan nei hi (Eph.5:32). Na Lawm dia mi tampi hon lak denduan a, deihdeih tel ding in hon chi hetkei ding a, Pathian in Adam kiang a Evi kia a piak (Gen.2:22) bang in, koppih ding khat kia a sehtuam a om a, Khristian ahih a, pum khat hihpih ding A deihdan ahi (Diut.7:3; 2 Kor.6:14-16). Tuapen kichiantak a theihtheihna ding in Pathian kiang a thum a, kuhkal tak a ngak, a lampi omsun leh hoihpen ahi (e.g. Gen.24:1-27).

Nihna: Tuailai leh Numei-pasalna (Youth and Sex) Hinkhua a sianthouna: Pathian in Numei leh pasal a bawlna ziak kichiantak Laisiangthou ah gen hi. Pathian in mihing masate – Pasal (Adam) leh Numei (Evi) in a siam hi. Nupa a pumkhat hiding in gawm a, nupa a kithuahna tungtawn a tate nei ding in vualzawl hi (Gen.1:27-27; 2:24; cf. Paun.5:18-19). Hiai thilhoih, kitengsa nupate kia zat dia Pathian bawl ahihman in, kiteng hilou tengteng adia hiai thilhih Pathian tung a khelhna, mihinpih tung a khelhna leh eimah taksa tung a khelhna ahi (1 Thess.4:3-4; cf. 1 Kor.7:2-3; Heb.13:4). Pathian bawldan theichian tuailai tampite, Joseph bang in kikem siangthou ua, Pathian vualzawlna thupi tak tang uhi (cf.Gen.39:9).

Thumna: Tuailai leh Kicheina (Youth and Fashion) Hinkhua a sianthouna: Tuailaite’ buaipih mahmah khat Fashion ahi. Melhoihte leh figure hoihte bang a om utna leh minthan utna ziak in TV & Magazine tuamtuamte apan Movie Stars leh Mi minthangte’ kicheinate leh kicheidante thupisa in, tuate bang in kichei ua, lungkim mahmah uhi. Mite kicheidan hoih i sak mahmahte toh ei kituak lou thei, mite neih bangbang en nei zoulou thei i hihman in, ei kilawmpih ding, ei toh kituak ding, i neih dan toh kituak a, lungkim a om a, Khristian huai tak a kichei Pathian deihdan leh kipahna ahi (1 Tm.2:9; 1 Pet.3:3-4).

Lina: Tuailai leh Tulai Vanzat (Youth and Digital) a sianthouna: Leitung mite khantouhna toh kiton in Digital (Mobile/Computer/Internet/Vehicle) vanzatte i zat louhtheihlouh hita hi. Adiak in, Tuailaite’n zang siam ua, pakta khawl ua, a zang dikte adi’n manpha in hamphatna tampi ngahna hi a, a zang khialte adia siatna tawpkhawk tuahna hizel hi. Pathian vualzawlna dong in, Computer, Mobile Phone, Internet leh Vehicle (Gari) zatna khang (Age) a omkha in, hiaite lou a khosak theih louh ding bang hialta hi. Mite’n bangchibang in zang talezong, Khristian tuailaite’n Pathian min thupina dia i zat ding A deihdan leh hon lametdan ahi (Paun.3:9; 1 Kor.10:43; Kol.3:22).

Ngana: Tuailai leh Nekvahluatna (Youth and Gluttony) Hinkhua a sianthouna: Tulai hun a tuailaite lak ah kamsung a guan leh nek ding omlou a khosa theilou tampi om hi. Tuaziak in, nek-le-dawn hoihlou – Laizial, Kuva, Dummuam, Zu, Damdawi khamtheih, etc. – ching a zongsang tamtak om uhi. Khovelmite’n thilchin in nei mahle uh, Khristian tuailaite’n, i taksa leh pumpi Pathian a ahihtak manin, i taksa adia phattuamna omlou kia hilou a, i taksa leh lungsim hon hihsia hiaibangte thilchin a i neih ding Pathian in a deihlouh kia hilou in, tuabang a thanghuai tak a hinkhua zangte tung a thangpai mahmah ahihdan gen hi (1 Kor.3:17; 6:19-20).

Thukhitna: Tuailai hinkhua a Pathian pomtak biak piakna i neih theihna ding in i nutsiat leh tawpsan dia hoihte Pathian muanna toh panla chiat in, kidek in, mangngilh in, taisan in, hinkhua thak a chidam zaw, siangthou zaw leh Khrist theihpihtu hi zaw ding in panla thak chiat lehang chih i kideihsak lua hi. Tuailai hun a Pathian pomtak biak piakna hinkhua a hing thei ding in nang mimal deihtelna a kinga ahihman in, Pathian deihdan leh lamet bang TUAILAI SIANGTHOU hiding in Toupa’n hon makaih zel hen, chih i kideihsak hi!

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia