General News

CIRCULAR/BYF DAY THUPUAK–2020

Jesu Khrist min a koimun peuh a om ka Tuailai pih te tengteng I Toupa leh Hondampa Jesu Khrist itna toh TUAILAI NI chibai ka hon buk hi. Tuni a BYF DAY zang ding a hong paikhawm Tuailaite leh saptuam mipite kiang BYF Day thupuak ka hon khak hiai ahi.

Tukum in COVID-19 ziakin bangkim dinkhol a hong om in kisakkholna bangin thil kisai leh zat theihlouh in hong om lai in, ka tuailai pih siamsin leh kong tuamtuam a sepna neite bangmah hihtheih nonlouh chi a dinkhol mailou dingin leh thathak la a HANCHIAM thak dingin Toupa min in ikichial thak hi. Khovel ei utdan leh deihdan a paitheilou ahihlai in hon taisan lou leh nuse ngeilou Pathian in hiai bang buaina tungtawn a banghiam sinsak nop leh kawk muh nop om hikha ding ahi.

Eimah omna mun chiat ah Pathian ading in hattak leh hangtak a kal isuan ngam poimoh ahi. Hiai khovel kilamdang jel mah leh eite hinkhua a hon Siampa Pathian in hon deihna leh Amah adia muanhuai a hinkhua zanga midangte a dia hingding a hon lam-etna lamdang ngeilou ahi. Aigupta a kial thupitak a tun lai a humbittu Tuailai Joseph ahi, Gam enkhia mi sawm te a lungkiak lai ua, gamchiam luah ngei ding ihi chia hangsan tak a pang minih Joshua leh Caleb te ahi, Mi 300 toh Midian te zoupa Tuailai Gideon ahi, milim mai a kunlou Tuailai mihangsan Danial leh a lawmte phok thak ni, a naupanna sitlou a hangsan tak a mite makaih Tuailai Timothy ahi, gen ding chi leng gen ding tampi omlai ding, amaute lungsim a ngaihtuah in, unau, nang leng hiai hun a om maimai ding hilou a na hih theih na lamlam a midang te a dinga panpih tu muanhuai isuah khiak hun ahi. Khovel a hoihlouh lai a nang hoihna khovel a na lahkhiak hun hiai bang hun ahi.

Tukum Tuailai Day iki sakkholna bang a zang theilou (azangthei khenkhat om mahleh) himahleng i niteng hinkhua pen Tuailai Day ahi chih phokin eimah omna mun chiat ah pan theih na lamlam ah pangin, eimah mohpuakna bangbang ah muanhuai in ginom tak in pang chiat ni. I hinkhua eimah deihtelna mai a zang lou in Khrist khebul ah kiluikhe thak in itenna khovel leh midangte a dingin Khrist theihpihtu muanhuai leh gah thupi leh manpha suahtu ihih theih chiatna dingin leh Pathian min pahtawina leh thupina I honghih ding lam-etna lianpi toh Pa Pathian, Tapa Pathian leh Khasiangthou Pathian min in DAY thupuak ka hon gelh hi. Toupa’n hon vualzawl chiat hen.

Tuabang hiding in Toupa’n michih hon vualzawl chiat hen aw!

NA VEK UN BYF DAY ZATNUAM.

 

Khrist a noute a,

Sd/- Rev. V. Thangkhanmuan
Youth Coordinator, EBC

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Locate us

MINISTRIES

© 2020 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia