Thumna Makai | KTZ

Thumna Makai | February 2019

1. SINTAWPNI: Kha thak hon musak i biak Pathian kiang ah kipahthu gen in, tukha damtak a i zat theihna ding in thum ni. February 1-3 sung EBCC Songtal in Hotdamna Camp nei ding a, Evan. T Damkhothang leh Evan. Lianding Guite thu gen in pang ding uh, thumpih ni.

2. KIGINNI: Dorcas Co-ordinator thak ding a guan a om Mrs Nemngaihmawi in mohpuakna lata hi. Toupa’n lampi thak tawnsak ahihman in gahsuang leh manphatak a a kizattheihna ding in thumpih ni.

3. NIPINI: Pastor G. Thuamminlian EBCC Khazang pansan a sem lel, a tanu kal natna ziak in Delhi ah ki-enkol uhi. A hong damsiangna ding un leh a sepna mun a saptuam mite kemtu leh huhtu upate ading in thumsak ni.

4. SEPPATNI: Convention English School ah regular class February 5 in kipanta ding hi. School a semtu Evangelist Teacher-te leh sinlai naupangte ading in Pathian ompihna, venbitna leh lohchinna ngen in thumsak ni.

5. SEPNAWNNI: Tuni apan ni 10 tan daih ding Manipur Evangelical Lutheran Church (MELC) Zou Colony in hotdamna chialpi nei ding uhi. Hiai program ah Evan. T Damkhothang, thugenpi in pang ding hi, lohching tak a zat ahihna ding in thumpih ni.

6. NILAINI: Youth Coordinator thak ding Toupa’n a hon piak Rev Thangkhanmuan in a mohpuakna sem panta hi. Pathian in tuailaite lak a sem ding hon piak nawn ziak a kipahthu gen kawm in gahsuah tak a a zatna ding in thumsak ni.

7. NINGANI: Semtute zite leh tate lak ah damlouhna tam mahmah, Toupa gam nasepna gahsuah leh lohching sem a honsep theih chiatna ding un, a inkuante uh chidamna ngetsak ni.

8. SINTAWPNI: February 10 in Rev K Kamchinkhup, Director of Missions in EBCC Delhi ah Mission Sunday zang in thu gen ding, thumpih ni. BCD teachers’ training program leng sutzop touh dia geel ahihman in, thumna ah phawk ni.

9. KIGINNI: I gam a halhna diktak a hong tunna ding in thumna in naksem in phawk ni. Nam sung buaina, gamsung buainate’n hon tuamdim bang a om i hihlai in khalam halhthakna mahmah i ngai hi, ngen ngutngut ni.

10. NIPINI: Mission Field a Superintendent mohpuakna lathak Rev N Tuanglang Karbi Anglong field; ban ah Himalayan ah Rev T Lalmalsawm, Manipur ah Rev Thang Johnson, taksa chidamna leh inkuan chidamna toh gahsuah tak a sem chiat thei ding in thumsak ni.

11. SEPPATNI: February 12-16 sung EBC semtute zite leh semtu numeite camp, Gilead Tlang ah om ding. Miss Liankhoman leh Miss Dimzangai thu gen in pang ding ua, Nu Niankhoching counsellor hiding. Thumna ah phawk ni.

12. SEPNAWNNI: EBC in Evangelist at large 2 i neihte ban ah Pathian in tukum thak ah mi 1 hon piak behlap hi. Amah Evan. Thangsuanpau, khomulou himahleh Pathian in nakpitak a a zat mi ahi a kipahhuai i sa. Amaute tungtawn a khalam vualzawlna tampi i tanna ding un thumpih gige ni.

13. NILAINI: Tuni akipan ni 17 tan daih ding EBCC Vengnuam in Nungzuihna Chialpi program nei ding uh, Evan. T Damkhothang in thu gen ding. Program lohchingtak a zat ahihna ding in thugentu leh mipite thumpih ni.

14. NINGANI: Pathian saptuamte kikepna dan dungzui a term thak a ding i hihman in General Secretary leh Directors mohpuakna len thak heutute’n Pathian deihna bang a Saptuamte hon makaih theihna ding un thumpih ni.

15. SINTAWPNI: Pathian gam sum saina a mohpuakna lenkhate Headquarters, Division, Mission Field, Book House, GBC, LRRC leh Tualsung Saptuam a Finance Department mohpaw tengteng thumsak ni.

16. KIGINNI: Nam sung a heutu pawl min nei tuamtuam ZRO, PTC, YPA, SSPP, PLS chihte’ lungsim munkhat a om a Pathian dong gige kawm a vaihawmna a neih theihna ding un thumsak ni.

17. NIPINI: Toupa belamte kemtu Pastor kitasam lou a hon koih ziak in Pathian kiang ah kipahthu gen ni. Toupa’ Saptuamte kembit a, vaklian a, khangsak thei kemtu muanhuai ahih chiatna ding un thumsak ni.

18. SEPPATNI: February 19-21 sung Guwahati ah India Baptist Women Union (IBWU) meeting om ding a, EBC apan in Miss Liankhoman leng vatel ding hi. India pumpi huap a Pathian gam nasepna poimohtak ahihman in thumna ah phawkni.

19. SEPNAWNNI: EBC in Partnership a Mission nna i seppihte FMPB, IEM, MVM, OMF, SIM, WEC ziak a kipahthu gen in, lohching leh gahsuah sem nading in thum ni.

20. NILAINI: February 22-24 sung EBCC Shillong in Praise & Worship Orientation nei ding a, Evan. Lianding Guite leh H. Siamkhansang Music Assistant sinsaktu in pang ding uh, thumpih ni.

21. NINGANI: February 21-24 sung EBCC Zion Veng in Second Coming Chialpi nei ding a, Evan. T Damkhothang in thu gen ding. Lohching tak a zat ahihna ding in thumna in phawk ni.

22. SINTAWPNI: EBC Mission fieldte ban ah Saptuam mi India leh gamdang a mission agency tuamtuam nasem hunkhop i neihte ziak in kipahthu gen ni. Minloh vek thei kei mahlehang Toupa vanzat poimoh leh gahsuah tak a hihna ding un thumpih ni.

23. KIGINNI: I mi leh sa, India gamsung leh gamdang a sepna nei leh siamsin a omte ziak a kipahthu gen in, Pathian lauhna toh honsep ua, hon sin zomzel theihna ding un thumpih ni.

24. NIPINI: Khopi Saptuam a om memberte tengteng leh amaute kemtu Pastor-te leh Upate thumna in phawk ni. Ginglou mite lak a khawsa ahikhol diak uh a, Khristian testimony hoihtak nei a om theihna ding un thumpih ni.

25. SEPPATNI: Singtang a om Saptuamte khalam vualzawlna leh salam nektak zonna vualzawlna ngen in thumpih ni. Toupa apan vuahtui leh nisate a hunhun a hon piakna ding in thum ni.

26. SEPNAWNNI: EBC Central Choir member-te ziak a kipahthu gen in, Pathian in manphasem a azatna ding in thumpih ni. Dorcas Hall leh i Office tuamtuam a sem clerical staff-te ziak in leng kipahthu gen in, felzosem a hon sep theih chiatna ding un thumpih ni.

27. NILAINI: Grace Bible College a semtute, Convention Book House a semtute leh Ebenezer Academy a semtute leh sinlai naupangte ziak a kipahthu gen in, Pathian pina ngetsak ni

28. NINGANI: February khatawp a hon pitung i biak Pathian kiang a kipahthu gen in, kha thak dam a hon muhsakna ding in thum ni.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC