Reports | KTZ

WEC Candidate Orientation a telte apan report tomkim

Simtute tengteng i Hondampa Jesu Khrist min in chibai kon buk uhi.

Pathian in Khamangthang nasepna ei Saptuam EBC tungtawn a a sepzom zel ziak in Pathian min i phat masa hi. Hiai nasepna sutzopna paitou zel ah Toupa’n gam zazawsem a septheihna ding kong hon honsakna WEC (Worldwide Evangelisation for Christ) International Missions agency ahi. Hiai WEC ahihleh C.T. Studd in 1913 kum a a na patkhiat ahi a, tulel in gam tuamtuam (Africa, Asia, Europe) te ah Missionary 1800 val nei uhi.

WEC in kingakna khuampi 4 nei a, huaite ahihleh: 1. Ginna (Faith) 2. Kipumpiakna (Sacrifice) 3. Sianthouna (Holiness) 4. Kithuahkhawmna (Fellowship) te ahi. A thulu uh ahihleh: “If Jesus Christ be God and died for me, then no sacrifice can be too great for me to make for him.” - C.T.Studd. (“Jesu Pathian hi napi a kei adia hong si ahih leh, Amah adia kei ka kipiakna athupi lua chih omlou ding hi.”) WEC tup leh ngiim ahih leh: Jesu khrist thei nailouten Jesu a hon theih ua, a hon it ua, a hon biak ding uh ahi. A naseppi pen uh: Khasiangthou pansan a veina leh kipiakna tungtawn a midangte toh tangthupha puanzakna tungtawn a Jesu Khrist a ginna hing hon neih ua nungzui muanhuai ahih ding uh. Ban ah a gingtate Laisiangthou a kinga saptuam phuhkhiat leh A mite mahmah zang a tangthupha tangkoupih ding a midangte chial leh nungthuap ding chih ahi.

Pathian pina toh Saptuamte sawl in kou teng in nisim 24th September apat 30th November 2018 tan Shillong ah the 3rd. Northeast WEC Candidate Orientation a va tel in Pathian hehpihna leh panpina toh maban a Pathian in pha hon sakpih leh sepna di mission field-te hon tel in ka hon zou uhi. Hiai hunsung a saptuamten non thumpihna uh Pathian in hon dawng ahihman in noute leh Pathian tung ah kipahthu ka hon gen uhi.

Mission field ding a ka hon telte uh ahihleh
1. N.Thangbiakmuan - Thailand.
2. Angela Lunhoih Hauzel - Cambodia
3. Zamhoihkim - China

Maban a VISA sai fel ahih a Saptuam heutute leh WEC Heutute vaisainate afel chiang a kuan khiat ding hita ahihman in Simtuten Thumna a i pan touh zel uh poimoh ding hi. Tua ding inleng ka hon ngen ngal uhi.
Khrist gam a ding a na seppih uh:
N.Thangbiakmuan
Angela Lunhoih Hauzel
Zamhoihkim.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC