Ordain Sunna | KTZ

Rev K Thuamvung, Pa (L) Upa Khamvung leh Nu (L) Khawlning te tapa upa pen May 20, 1937 in Senvon khua ah piang hi. Aman pianpih unau pasal 3 leh numei 5 nei hi. Kum 1951-1953 sung Mission Compound ah laisim in om hi. Huai a a omlai in Hotdamna chialpina om a Rev H.L. Sela thugenna tungtawn in hotdam kitheihchetna nei hi. 1957 in Churachandpur Government H/S ah pawl 10 zou a; Sielmat Christian College ah 1967 in B.A zou hi. 1960 kum in Mission Compound ah pem ua, 1964 kum in nungak Ngaidam toh Mission Compound ah Rev H Nengzachin khut ah kiteng uhi. Pathian vualzawlna gil a gah goutan tapa 6 leh tanu 2 nei uhi.

Pathian Nna a sepna: NEIG Mission nuai a Junior High School ah 1958 in Pathian nasep a pan a, EBC saptuam ah sumkemtu (Treasurer) nasep toh thuah hi. Treasurer na hun sawttak lentou a, hiai a letsung in Paite Holy Bible sut masakpen kisun in kihong khia hi. NEIG Mission nuaia a sepsung in a suty hunte ah chialpina bawl in kho tuamtuam ah zinzel hi. NEIG Mission nuai a kum 23 a sep nung kum 1980 a Ulian Bible Camp 1na tungtawn in Toupa’n a Belampu ding a sam ahihdan chiantak a theihna nei in January 15, 1981 in Pastor ordination tang hi. EBC nasepna sung a a kizatkhaknate Local Pastor, Divisional Superintendent leh Director mohpuaknate len in kum 40 sung fulltime a a sepnung in July 15, 1998 in pension hi. Aman Pathian gam nasepna a lungsim tengteng leh a hatna tengteng zang khin dimdem ahihman in a pension nung nangawn inleng a sulnung chiamteh theihna hoihtak nei mi ahi. Huchi bang mi ahihman in heutu masa thudottham leh a sihtan dong a khangthakte adia heutu poimoh ahi den hi.

A natna: Pathian vualzawlna a tantuan mahmahte ahihleh pianken a chidam theitak, maitai, paunuam, nekmoh neilou ahihlai in lungtang natna (heart case) nei ana hi hi. Kum 2007 in a natna heart case hong uang deuhdeuh a Imphal CMC ah operation nei hi. Kum 2012 in sisan khum neihbeh nawn a hatlouh lam nawt hiaihiai hi. Kum 2014 in khatvei buaisia a, himahleh hong halhkhe nawn in 2015 in buaise nawn a RIMS ah ki admit in, hoihdeuh zel buaise thei dinmun a om zel in omtou nilouh hi. Pathian hunseh hong tung in March 25, 2018 Palm Sunday zingkal dak 6.30 in ginomtak a a nungzui a A nna a sep Toupa kiang a tawldamta ding in hon paisan hi. EBC ading a khuam poimoh mahmah ahihman in i sun mahmah hi.


Toupa’n a inkuante khamuan in ompih tawntung hen.


Upa Khoidong Guite, Pu (L) Ginthawng Guite leh Pi (L) Damngai te tapa Vokbual khua ah kum 1937 in piang hi. Kum 1953 in Pastor Nengthawn khut ah Baptisna tang hi. Pu Vungkhohen, Vokbual hausa tanu Doikim toh February 17, 1961 in Pastor H. Thualkhothang in Khristian dan siangthou in kiteng sak hi.

January 24, 1972 in Hanship a Manipur Christian Convention (MCC) tua EBC Kumsim Khawmpi in Pastor Kaineng in Upa Ordain pia hi. Vokbual ECC ah Local Chairman in 1972 apan 1983 sung ana pang a, kum 1984 apan a sih dong in EBCC Central Lamka saptuam ah ginom tak in Belampu in pang hi. Central Lamka Missions Committee member inleng ana pang in, 1984 apan term khat sung Central Lamka EBCC Saptuam ah Dorcas Adviser in pang hi. A sihtan dong Central Lamka ah Khristian Thukizakna hawmtu in pang hi. December 9, 2007 a EBC Kumsim Khawmpi in Upa Pahtakna lai na sang hi.

A damliai nakleh zing devotion pellou a hoh gige a, biakna leh thumna limsak mahmah mi ahi. Mi chi damthei tak ahi a, December 2017 apat taksa hatlouhna tuamtuam ziak a Doctor a ki-enkol lai lungtang lam buaina (Heart case) ziak in March 2, 2018 zinglam in buai guih in Lamka Damdawi inn ah ki polut hi. Hong hoihtou zel dia lamet ahihlai in March 2, 2018 sunnung dak 3:25pm vel in a muan, a nung a zuih Pa Pathian kiang a tawldam ding in hon na paisan hi. EBCC Central Lamka saptuam in March 3, 2018 in it tak leh khelah tak in kivuiliam ta hi. Kum 81 tan a damsung in, a hun tampi Pathian leh a kep Belamte adin zang hi. Upa in a nutsiat a innkuanpihte thumna in phawk chiat ni.


Upa Vumzalian Vualnam, Phamta Pu Vumkhokam Vualnam leh Pi Manzaching te goutan sagihte lak a masapen October 18, 1958 in Savaipaih ah piang hi. Kum 1966 in Mission Compound ah pem uhi. Laisimna lam ah Rostad Memorial High School ah Class X tan sim in; Churachandpur College ah BA tan zoukhia hi.


Nungak Thienkhohoi toh 1984 kum in Mission Compound ah Rev T. Paukholien Gangte khut ah Saptuam dan in kiteng uhi. Tanu 1 tapa nih nei uhi. 1986 in Manipur Government nuai ah Medical Department ah sepna mu in, District Hospital Churachandpur a District Immunization Office ah a sihni tan in sem hi.


A tate laisinna ding lemtang zaw gelna in Mission Compound apan Gochinkhup Veng, New Lamka ah 1992 in pem hi. EBCC Bethlehem ah ginomtak in Pathian gam adia amah hihthei khomkhom a nasem in 2015 kum in Upa Ordination tang in Toupa belamte kepna ah kuhkaltak leh phattuamngai tak in a sihni dong in sem hi.


Anatna: Kum 20 lam khong Zunkhum nei in na kikemtou den a, muanmoh huai khollou bang a akilat lai in hitang khosik ziak a thachau in gimphut a, kepmanlouh leh khoimanlouh phial a om in February 21, 2018 in a muan a, a nung a zuihpa Pathian kiang a thupina gam a tawldam ding in hon na paisanta hi. A nutsiat a zi, tate thum, a tute nih leh a kep Saptuamte Pathian khamuanna ngen in thumsak ni.


Page 1 of 5

© 2018 Evangelical Baptist Convention. All Rights Reserved. Designed By EBC