Gammial Aw | KTZ

Gammial Aw | February 2019

Amasa in Gammial Aw Simtute tengteng Jesu Khrist min in Chibai. Mission fieldte a i sepna gah kipahhuai Toupan hon muhsakte anuai a bang in enkhawm nawn leng i chi hi:

A. HIMALAYAN MISSION FIELD
1. Khristmas Zatna Report:
Khristmas 2018 hun in Saptuam tamtak in hiai ni poimoh Hotdamna chialpina hun lemtang a la in program tuamtuam anuai a bang in zang uhi.

• Bhuttabari EBCC in amau khua sung a gingtute inn teng pansan in nitak 3 Khristmas Carol zang ua, lasakna, lamna leh thutak genna hun ban ah neek-khawmna hun zang uhi. Tua hunte ah ginglou tamkhop va kihel gige ua, Gospel tracts leng tamkhop hawmkhia uhi. Khristmas nipini in leng ginglou mi tamkhop va kihel in, program lohchingtak in zou uhi.
• Bhudabare NEBCC ah Khristmas Carol leh Advent Christmas December 21 leh 22, 2018 in nei uhi. Hiai hun in gingtu leh gingloute leng paikhawm in Khristmas laa sakna leh lam lahna ban ah message genna lohchingtak in zang uhi. Hiai hun ah Khristian ana hinailou, kho sung a mi tallang deuhte chial khawm in hun manpha tak zatkhawm pih uhi.
• Birtamode NEBCC ah carol mun 6 a neih in om. Hiai hunte ah Khristmas la sakna, lam lahna leh Khristmas message genna hun zat zel in om a, neek ding inntekten a bawlzel ban uah saptuam mi leh kim-le-kiang a om gingloute saptuamte’n chialkhawm in, ginglou tamtak in Khristmas message va ngaikhe zel uhi. Khristmas nipini in kitaitehna tuamtuam leh kipahman hawmna om a, ginglou tamtak in hiai hun uap in, paikhawmte’n annekkhawmna leng nei uhi.
• Takuthang EBCC ah December 24,2018 in nitak hun khat zat in om a, a nipini in hun 2 zat in om hi. Khristmas nipini in ginglou tamkhop in va uap ua, mi 80 vel kikhawm in Christmas annkuang umkhawmna nei uhi. Hiai hun in thutak genna, lasakna leh lam lahna hun manpha tak zang thei uhi.
• Missions Field ah Khristmas leh hun poimoh dangte a biiktak in inn veng gingloute toh kizopna hoihtak bawlna leh tanchinhoih gentheihna hun lemtang a la in amaute lunglut theihna ding zong in panlakna field in neisek hi.

2. Kipahthu Genna & Thumna Dingte:
• December 2018 kha sung in Pathian in Gingthak mi 9 leh Baptisma tang mi 6 a hon piakte ziak in Pathian kiang ah kipahthu gen ni. Khalam a hong khanlet zel theihna ding un thum zom lai ni.
• Kum 2019 a semtu ding Casual Native Evangelist 24, Accountant 1 leh Caretaker ding 1 DPC in recommend bawl pomna leh a station ding uh sehna FWC in January 03,2019 in neita hi. Kipahthu gen in Pathian piina toh lamzang tak a hon sep theihna ding un thum ni.
• Evangelist Chingkhongai, Jorethang Sikkim station a sem a kal a suang om atkhiak ngai ding. Doctor naih a, apoimoh bangbang sepzui ahih a, treatment lamzang tak a hon lak ua, a hong damsiang theihna ding in thumpih ni.

B. KARBI ANGLONG MISSION FIELD:
1. THUTUAMTUAM:
• Pastor Area Conference: Pastor Joel Hanse Bial sung a om Saptuamte’n Area Khawmpi a khatveina December 01- 03, 2018 sung “Lei Chi nahi uh” (Matt 5:13) chih thupi pansan in nei uhi. Hiai hun in Rev Jemson Bey, Asst. Field Superintendent in Pathian thutak genna nei a, a tel khempeuh in nuam sa chiat uhi.
• Biakin thak honna: New Langrik mun ah EBC Headquarters, Field leh local Saptuamte pangkhawm a Biakin kilam, zoh ahih toh kiton in December 14,2018 in Rev V. Thangkhangin, Director of Missions EBC in honna leh latna nei hi.
• Chialpina Program: December 14-17,2018 leh December 18-19,2018 sung in EBCC New Langrik ah Field sung a Papite ading Hotdamna Camp neih in om hi. Papi Camp zoh ahih phet in GBC Studentte ading Spiritual Retreat Program neih zawm in om ngal hi. Hiai hunte ah thugentu in Pastor Jacob Rongpi leh Evan. H. Jamkhanmang pang uhi. Piangthak leh kilanthak thei hunkhop omman in Pathian kiang ah kipahthu gen ni.
• Bial & Field Joint Fellowship: December 22,2018 in EBCC Diphu, Rongmili Biakin ah Bial leh Field te’n Joint Fellowship-cum-Pre-Christmas Celebration Program nei uhi. Hiai hun ah Department chih akipan Khristmas greetings om a, Field Superintendent in thugenna hun zang hi. Member paikhawmte’n Christmas gift exchange leng nei in atel khempeuh te’n nuam sa chiat uhi.

2. Kipahthu Genna & Thumna Dingte:
• Semtu kisuanthakte’n a sepna mun chiat ua chidamtak a ava sep theih chiat na ding un thumpih ni.
• Khristian lunglut mahmah Kangbura Timung te inkuan, Kolomsing Krote te inkuan, Mon golsing Ingti te inkuan, Longki Ingti te inkuan leh Kangbura Ingti te inkuan Khristian a hong kipiak ngamna ding un thumpih ni.
• Waisong Rongkhelan mun a Advance Christmas Program neih hun in Pathian thu lunglut Mr Longki Teron, Sika Kropi leh a inkuante’n Jesu ka Lal leh Hondampa ding in ka sang thei a chih man un kipahthu gen in, a kam ua a kipuan bang ua, gingtu muanhuai hong hih theihna ding un thumpih ni.

C. DHEMAJI MISSION FIELD:
Kipahthu genna & Thumna Dingte.
1. Field Superintendent in a term chidam tak a azoh ban ah Term thak mohpuakna Pathian pina toh hon sepzui theihna ding in thumpih ni.
2. Evan. T Nengminlun in Karbi Anglong Field akipan Dhemaji Field Office ah accountant ding in charge lata hi. Pathian kiang ah kipahthu gen in chidam tak a hon sepzawm theihna ding in thumpih ni.
3. Khristmas leh kumthak hunte buaina bangmah omlou a zatzoh ahih man in Pathian kiang ah kipahthu gen ni.
4. Pathian in kumthak 2019 damtak a hon pikai toh kiton in, Semtu te’n naksem a sepna kum hong hih a, gingtute leng ginna thuk zawsem a zungkai hong hihna kum uh ahihna ding in Pathian kiang ah thum ni.
5. EBCC Itanagar biakin ding, Upa Haulemthang Gualnam inn pangbel in bawlthak in om hi. Biakin bawl zoh ahih a buaina omlou a zat ahih theihna ding in thum ni.
6. Field a kipan GBC a Bible zil Mr Chiro Kumar Pegu in Diploma in Theology leh Miss Deeparani Doley in Diploma in Theology zoukhia uhi. Field akipan graduate neih masak penpen te ahihman un kipahpih huai sa in field in January 03, 2019 in Field Office ah Felicitation Program zatpih hi. Amaute manpha tak a field a hong kizat theih nading un thumna ah phawkchiat ni.
7. TBDF EBCC Guwahati in Year Plan a aguan uh puansilh tamtak Dhemaji Field ah thon uhi. Khristmas thilpiak ding in saptuam chih ah hawmkhiak vek in om a, gingtu te’n kipahpih mahmah uhi. Thilpiak petute leh piak a omten vualzawlna tamsem a ngahna uh ahihna ding in thumpi ni.

D. MANIPUR MISSION FIELD:
1. THU TUAM TUAMTE :
• Maitram a Field Office ding lamna in masawn zel hi. Tuni tan in akhuam teng tunding hita. Lamzang tak a sep touh zel ahih theihna din thumna in phawk ni.
• Wapokpi (Sugnu) biakin ding EBCC Central Lamka panlakna a kibawl in masawn zel. Buaina omlou a zohsiang ahihtheih nading in thumna in phawk ni.
• Jiribam a MEBC biakin bawlna nasep pailel, lamzang tak a zoh ahih theihna ding in thumna ah phawk ni.
2. Kipahthu genna leh Thumna dingte:
• Mass counseling/Group evangelism January – December 2018 tan a Toupa hon vualzawlna piangthak target 100 lak ah 139; Baptisma tang target 50 lak ah mi 43; sawm-a-khat pethak ding target 50 lak ah 70; MMV mi 50 target lak ah 40 hon piak ziak in Pathian kiang ah kipahthu gen ni. 2019 a atamzaw sem hon piakna ding in thum lai ni.
• Kum 2019 a Casual Native a sem ding mi 11 field in a lak thak te’n gahsuah tak a hon septheihna ding un thumsak ni.
• Kum paisa sang a masawn leh gahsuah zaw a sep ding deih leh lametna in field in semtute ading in DAILY SCHEDULE leh WORKER’s TARGET GOAL SETTING – 2019 bawlsak hi. Hiai tungtawn a semtute’n pan nasa zawsem a hon lak ua, khamangthang tamsem TOUPA khebul tut ahong hih theihna ding in thumpih ni.
• Biakin mun ding lemchang nei thei nailou – Awangjiri leh Heisnam fellowship ten Pathian ompihna tang a amau atuam ding biakin lamna ding mun-le-mual ahon neih theihna ding un Toupa ompihna ngen in thumsak ni.

 

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC