Editorial

Pathian Pomtak Biakna

Huchi in unaute aw, Pathian zahngaihna ziak in, kithoihna hing, siangthou leh Pathian lungtuak ding in na sapum uh lan ding in k’on ngen ahi; huai na biakna dan ding him uh ahi (Rom 12:1).

Simtute deihtakte kumthak 2019 chibai kon buk hi. Damsung khualzinna anuam ahaksa, kipahna leh dahna kihelh tou tou ah Toupa’n ei dia hunte hon thaksak lai ahihman in i kipak mahmah hi. Tu kum thak ah “Pathian Pomtak Biakna” chih i thupi ding un heutute’n a hon teel uhi. Hiai thupi ineih toh kiton a tukum tuh Pathian toh kinaisem a ton a, i pumpi amah biakna, i ngaihtuahna Amah biakna, i insung Amah biakna, i khut nasepte Amah adia pomtak leh saantak Biakna ahong hih ding i kideihsak petmah hi. Pomtak Biakna Laisiangthou sinsak thupi pente lak a khat ahihman in Saptuam tangthu a Confession of Faith tuam tuam te’n a gen kha sek ua, Reformation hun a makaiten leng apoimoh ngaih mahmah uh ‘biakna’ ahi. EBC Dan bu ah leng saptuam dinsan poimohpen Biakna ahi chiin akigelh hi. Pomtak Biakna a om theihna ding in Pathian toh kituahna diktak, pianthakna i chih a poimoh masa hi. Pathian toh kituah dik a om theihna ding in Tanchin Hoih genna apoimoh hi. Thudang in gen leng biakna a poimoh ziak in missions a hong om hi. John Piper in Namte Kipak Uhen chih laibu a gelhna ah Biakna a omlouh ziak a missions hong om ahi (Missions Exists Because Worship Doesn’t) chih a na gen Evangelical Pawlpite lak a gen mangmoh thudik khat asuak hi. Hiai i thupi uh Saptuam hinkhua khek lamdang thei ding khop a poimoh ahi. Tuhun a Khristiante buaina Pathian pomtaklouh thugen, pomtak louh thilpiak, pomtak louh nasep, pomtak louh kampau, pomtak louh biakin programme, pomtak louh thum khawmna, pomtaklouh inkuan chih te ahi. Alehlam ah i biakna uh mahni kihoihsak, kidiksak, i thumpihte, i seppihte muhdah gukna toh biakna i hahbawl uhi. Ahihleh pomtak biakna bang hi ding hiam chih Bible apan i muhkhiak thak uh a poimoh hi.

Kha leh Thutak a Pathian Biak ding ahi (Jn 4:24): Pathian biakna diktak tuh mihing kha toh Pathian hing kisukha a biakna ahi. Jesun Pathian tuh lungtang, kha, leh lungsim tengteng a it ding ahi, a chi hi (Mat 2237). Mihing khophawk theihna, nehnou theihna, lunggel theihna, deihtel theihna, ut theihna teng teng Pathian’ angsung a zulmang khop a biakna ahi. Pomtak biakna tuh biakna mun, puansilh, biakdan (style), music chihte ah akinga masa kei. Adiklel gen leng hiai omhetlou inleng pomtak biakna a piak theih lua hi. A poimoh pen tawmkan, apoimohlou zawte thupi bawl, tuhun a i buaina uh ahi. Bible in Kha leh thutak a chih chiamteh ding om hi. Mi’n kha kia a gen-ot chiang un paikhelhna a baihlam hi. Huai ziak in, biakna kichi Thutak a kinga leh tonkhawm ahih ding ahi. Tua Thutak kichi bel Pathian’ itna, Pathian’ siangthouna, Pathian’ diktatna, Pathian’ pilna, Pathian’ hatna, Pathian’ mulkimhuaina, Pathian’ thangpaihna, Pathian’ zahngaihna chihte leh Pathian toh kisai thutak Bible in a hon hilhte ahi. Huai ziak in, mimal biakna ah music a om keileh kibe theilou, puan tuambik khat i silh keileh pomtak hi theilou, koimun hiam ahih keileh kibe theilou chihte pomtaklou biakna chiamtehna ahi (Jn 4:21). Hiaite apoimoh hetkei i chihna hilou in hiaite ziak a pomtak biakna piang hilou in kha leh Thutak a biakna a poimoh masa i chih nopna ahi.

Pathian zahtakna leh tawisangna (Phil 2:9). Thutak a biakna in Pathian toh kisai thutakte hon muchiansak a, tua Thutak in abetu kitamkham sak in kingainiam sak a, Pathian thupina leh tungnunna musak sem sem hi. Tua muhchetna pen pomtak biakna hikhin zou hi. Jawlnei Isai in kumpipa Uzziah a sih kum in Toupa sangtak-a kumpi toukhom tung a tu a muh in a hinna zou petmah a, “…ka tung gik hina tel e!” a chi khia a Toupa nasem ding in a kipia hi (Is 6:9). Biakna diktak pen mihing pilna a bawlkhiak hilou in Pathian’ lungtaina a kipan ahi. Pathian hing mukha mite’n A thupina, itna, ngaihdamna, hoihnate mu uh a tua in lausak hiam, khukdinsak hiam, tuanglai a lumsak hiam, dingsak hiam, kapsak hiam, kipak a nuisak hiam in a betu hinna sukkhak (effect) a nei hi. Pathian sukkhak hilou sawm a sawm thoh ahih chiang in a lemching kisuak hi. Pathian biakna ah alem chin thohte pomtak hitheilou hi. Pomtak biakna ah Pathian thupina piakna ahih ziak in muh ding lamet nei biakna ahi kei hi. David in Kei lam a bangmah senna omlou in Toupa ka Pathian kiang ah haltum thillatte ka lan kei ding (2 Sam 24:24) a chih bang a piak neilou biakna zaw Pathian Pomtak Biakna ahi theikei hi. Huai ziak in, na pumpi uh kilan ding in kon ngen, Paul in a chi hi. Pomtak Biakna pe ding in Toupan hon vualzawl hen.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC