Editorial

NANG VUALZAWLNA HI IN

Nam thupi in kon bawl ding a, kon vualzawl ding a, na min ka liansak ding a, nang vualzawlna na hi ding (Gen 12:2).

Khovel ah thil hoih peuhmah in melma anei a, vualzawlna in leng ‘hamsia’ kichi melma anei hi. Vualzawlna toh kisai tampi i gen un i sata uhi. Ahi a vualzawlna taktak pen gentam a hong tung ding hiam sin siam chiang a hong tung ding hiam hilou in i hinna Pathian pahtak leh pomtak i hih chiang a hong tung ding ahi. Himahleh, tua vualzawlna tan i tunma un gingtu tampi gahsuahlou in hut (lohsam) sek uhi. Gingtu tampi vualzawlna ahihnaksang un hamsia ahizaw sek uhi. Pathian in Abraham a sapna ziak midangte adia vualzawlna hiding chih ahi. Ahihleh bangchi bang a vualzawlna hiding chih i theihchet a poimoh hi.

Mimal hinkhua ah: Abraham kiang a Pathian’ thugen “Nang Vualzawlna Hi In” chih ahi. Vualzawlna kipatna ding “Nang” chih ahi. Vualzawlna kichi ei a pakkhia leh gahkhia midang muh theih, leh azalzou theih thil hoihte ahi. Mihingte pen akhialsa i hihman in asia toh kidimsa i hi a, Jesu in tua i pianken lui a khek khiak masak keileh thil hoih a vualzawlna kihi theilou hi. Mihing khat vualzawlna hih ding chih pen thil hoih a dimlet hinkhua genna ahi. Laisiangthou in gingtu mimalte a dimletna ding uh thilte hichibang in a gen hi. Lungtang a Khrist tensak a itna a zungkaih ding (Eph 3:17). Pathian tangchinna chiteng a hihdim a om ding (Eph 3:19). Pathian Kha thopna tang ding (Eph 4:12,13). Pathian toh kilemna tungtawn a Khrist bukimna tangsam ding (Kol 1:18,19). Theihsiamna mit hihvak a om a Pathian sapna leh a gouluah ding thupi mu ding in (Eph 1:18). Khrist tuh a hauhsakna teng toh eimah a omsak kiih keih ding (Kol 3:16). Pathian pianken a hoihnate; Itna, kipahna, lemna, thuaktheihna, migitna, hoihna, muanhuaina, nunnemna, kidektheihna chihte Kha Siangthou tungtawn a mahni hinkhua a gah khiak sak ding (Gal 5:22,23). Kha Siangthou hih lungkham louh ding tua ding a kihehpih chiat a lainatna neia kingaihdam tuah chiat ding (Eph 4:32). Mihinpihte it ding leibat a neih den ding (Ro 13:8-10). Mimal hinkhua a hiai thil hoihte agahkhiak chiang in midangte adia vualzawlna i hi thei phet ding uhi.

Inkuan ah: A gah thei dingte bel Jesu Khrist hondampa a sang mite ahi uhi. Gingtute i gahkhiak chiang un midangte adia vualzawlna i hi thei pan uhi. I gahkhiakna ding uh leitung thil neih-le-lamte himasa lou in Pathian pianken hoihnate atung i gente ahi. I gahkhiakna masapen ding tuh eimah mimal hinkhua ah ahi. Ei mimal ah tuate a gah chiang in inkuanpihte leh midangte’n Jesu kilawmna ei ah a mu ding uhi. Tuaban ah mission field khawng leh i hihna hon theichianloute kiang a vagah masak ding hilou in ei toh nekhawm-dawnkhawm i khosakpih inkuante lak ah ahih ding ahi. Khrist itna, nunnemna leh hoihnate mahni insung ah gahkhesak himaizen leng i insungte uah Khrist mel akilang ding a “Aw nang omna peuh ka kha in nuamsa hi” chih a tangtung ding hi.

Ahihhang in eite tuabang in i gah kei sek uhi. Biakin ah i gah ua, insung ah gah haksa i sa uh. Mipi kikhopna nuam i sa ua inkuan kikhop haksa i sa uh. Mipi lak ah i lam thei ua insung ah i tate’n hon um kei uh. Ei a khamite’n veina i chih pen i vei mite’n chimtakhuai leh Ninhuai hiin a thei uh. Biakin a khamit apoimoh a, insung a khamit apoimoh sem. Biakin a sermon thupi taktak genkhiak a hoih lua himahleh mahni insung a gospel hinkhiakpih a gahsuah zaw. Itna pen academic workshop khawng a theihchet ahikeia a sinsaktu in amah a ki-it bang a midang a it chiang in mite’n itna hiai ahi maw chih a theichian pen hi. Biakin kikhop a poimoh tham-a inkuan biakna hing a poimoh masa zaw. Tuhun pen remote khovel, agal a thil sai siamna khovel ahita. Sepna neite’n agal a sem theita, gam itte’n leng agal a it theita, khotang siatna veite’n leng agal a vei, a veipha diakte’n midang hih dia koih, midangte mohsa. Himahleh, Pathian nasepna pen agal a kisem theilou hi. Toupa amau ah kipansak in chih sang in kei ah kipansak in chih adik zaw hi. Remote a thil sai himhim a hoihlouhna tuh amun-a nasep omlou ahi. Pathian in Abraham kiang a a thugen “Nang vualzawlna hi in” a chih pen ‘Amau vualzawlna hiding in va nawk in’ chiin i kheksak thei kei ding. Himahleh Pathian thu kikhek ngeilou ahi. Midang tampite adia vualzawlna i hih zoh kei leleng i koppih ading leh Insung ading beek in khalam vualzawlna hih sawm ni. Pathian thu pen po-awi nawnlou in sung-awi i sawmta ding uh.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC