Editorial

NANG VUALZAWLNA HI IN (Guest Editorial)

Thupatna: Hiai thupi gelh thei ding a lemtanna piak a ka om man in ka kipak hi. Hiai hi a kilatdan in thupiak ahi. Thupiak hi kawm in deihsakna leng taklat ahi.

Vualzawlna i chih bang ahi diam aw? Laisiangthou ah vualzawlna a chih chiang in thilhoih, thil deihhuai tengteng a tun vek hi. Taksa, lungsim leh khalama chidamna, inten louten a kiningching, vual englou, silh-le-ten, sum-le-pai kiningching, tu leh ta a vualzawlnate leh mite zahtak tham a hing a khosa chih genna ahi. Deihthusam tengteng tangtunna genna ahi. Ahihleh, hiai leitung a, taksa a damlai a tuabang om thei ding mah ahi diam? Genesis 12:1-3 sung i etleh, Pathian in tuabang tengteng Abraham tung a tungsak ding leh, tuate mah midangte tung a tungsak sawntu ding a Abraham zatsawm ahi chih i mu hi. Hiai a Pathian in Abraham kiang a a thuchiamte tuh: (1) Tusuan, tasuan, khovel tawpdong a pung a hat deuhdeuh kon pe ding. (2) Gam ka hon pe ding. (3) Nang tungtawn in leitung pumpi in vualzawlna a ngah ding, chihte ahi.

Vualzawlna koi a kipan? Pathian, Lei leh Van bawltu, a tawptan a kembit dingtu khut sung ah vualzawlna tengteng a om hi. Aman mihingte amah batpih in bawl a, it mahmah hi. Tuabang a a it mahmahte kipak, lungnuam, lungkim leh a haksa a nuamlou himhim thei banlou ding in deihlua hi. Tuabang in Eden huan ah na koih hi. Himahleh, Pathuan thu manlouhna, Pathian helsanna a hon neih ua kipan a vualzawlna teng uh mansuah in, a suan, a pak uh, leitung mihing tengteng gentheihna, lungsim leh taksa a gimthuakna genvuallouh ah a hon lutpih uhi. Tuabang dinmun a omlai mihingte Pathian in vualzawl sawm a, a vualzawlnate amah muang, amah bel tettet mite tungtawn a midangte tung a tunsak sawm hi. Huaiziak in, tukum saptuam thupi “Nang Vualzawlna hi in” chihpen “Nang midangte ading a vualzawlna hiin” chihna ahi i chi thei hi. Pathian in leitung mite salam, lungsim leh khalam a vualzawl ding a thilsawm hi a, tua pen, a zattheih dia kipia mihingte zang a sepsuah a sawm hi.

Hiaite a tangtunna ding in bang a kul a? Pathian in vualzawlna mite kiang a a piaksawnna dia kiphal, Pathian in a utdandan-a a zat dia kiluikhia i hih a poimoh hi. Tuabang ding in Abraham kiluikhia a, Pathian gen bangbang, a chih dandan zui takpi hi. Hiaiin amah ading in haksatna, gimthuakna, lunggimna namenlou tungsak a, himahleh tuapen amah adia kisikhuai hetlou ding in Pathian in bawl hi. A haksatna thuakte tamlou en lehang: (1) A it, a ngaih, a lawm, a vualte, a tanau laina, a insak inkhangte, a khosakna nuamtakte a nutsiat vek a, koilam a, bangthil tuak ding ahia chih theichianloua Pathian pina a zuih kul hi. (2) A pa Haran khua a a vui kul. (3) A teknung-a a neih a tapa tangkhat neihsun Isak maitama a latkhiak ngam kul. (4) Amah tapa ngelngel Ismael leh a nu koi ah bang a suak ding ua chih theilou a a sawlkhiak kul. Vualzawlna i suah theihna ding in a man i piak kul hi. I kikhenkhiakpih ding tamtak om ahi. Jerusalem khopi a miten Jesu a muh ua, a pahtawi theihna ding un, sabiltung a kikhihnate apan phelkhiak kul. Nang tungtawn-a Jesun pahtawina a san a, midangten, salam, khalam vualzawlna a ngahna ding un nang bang in a hon khihden a? Bangteng apan phelkhiak na kul a? Midangten amah ziak a hotdamna a ngahna ding un Jesu Kros tung a asih kul hi. Nang bang na sihsan a kul a? Mahni masialna, duh-amna, midangte awlmohlouhna, itna- deihsakna taksapnate apan suahtaksak a i om kul hi.

Pathian in Abraham kiang ah, Nang ka hon vualzawl ding a, huchiin nang tungtawn in leitung mi tengteng in vualzawlna a ngah ding uh a chi. Hiai ah salam vualzawlna leh khalam vualzawlna tel tuaktuak ahi. Abraham suan akipan Jesu hongpiang a, Jesun leitung mi tengteng ading hotdamna a hon tun hi. Jesu hotdamna sang a, Bible genbanga hingten salam vualzawlna leh khalam vualzawlna ngah nak uhi. Hiaipen nang mimal ah zong a dik na chih theih ngei ka lamen. Tuapen Pathian in nangmah zong midangte ading a salam, khalam a vualzawlna na hih ding a ngimna ahi. Huai in a gen tuh, a pesawntu i hih ding chihna ahi. Himahleh mihingte lungsimput ngeina bel, a tamtheitawp neih a, khol a, huaite muang a khosak ding ahi. Hiaipen Pathian hon ngimdan na hikhalou hi. Hiai lungsim put in Pathian hon ngimdan kalhkha a, midangten ei tungtawn a vualzawlna a ngah ding uh ngahlouh loh ua, eimah kiang a vualzawlna hong luanbeh dingte dalkha hi. Thamlou in, i vualzawlna donte zatdan ding deihhuailou, uthuailou taktak a zatkhak theihna leng ahi.

Pathian in eite vualzawlna tuilawng a pang ding a a hon deihlai a, eite a kholkhawmna tuibempi i hihleh, Pathian deihdan, hon ngimdan toh kituaklou ding hi. Miten khalam hinna a neihna ding un i neih, i lamte, sumlehpai ban ah, i hinna i piakkhiak ngam a kul mahmah. I kikhenpih ngam ding tam peuhmah hi. Tuate kikhenpih ngamlou a i omleh, a tuibem, tui kikholna tuibawmpi suahsawm i hikha ding. Tuipi si a sihziak, bangmah a piakkhiak hetlouh ziak ahi. Galili tuipi a nga a omtheihna ziak a luangpawt leng a om ziak ahi. Toupa Jesun “Lak sang in piak in lukhawng a neizaw” a chi (Nasep. 20:35). A sangtu hih sang in a petu hih a vualzawl huaizaw chihna ahi. Khangluiten leng a na thei ua “Uunta a sibaih, hawmsem a nungta” a na chi uh. Kristian (makai) khat hi a, miten “Huai chilkonpa/nu” a hon chih ualeh tuh kingaihtuah kul ding hi. Mite hon lametna tengteng i hihbuching zou vek ding i chi kei. Himahleh Pathian hon lametna tan, ei tungtawn a midang kiang a tunsak asawmte na kholkhawm venvontu a i panlouh ding ah. Tuni a Americate leitung a gam hausapen, thilhihtheipen ahihna ziakte uh laka khat, thilpiak utmi, thilpiak nuamsa mi, a neihlouh tantan uh leng pephalte ahihziak uh hi ding a ngaihtuah ka hi. Tuikholna tuibempi hihsawm lou in, a luanna tuilawng, Pathian hon ngimna a pan sawmni. Saptuam hiam, missionary pawl tuamtuam, FMPB, IEM, MVM te tungtawn a missionary vak hiam, missionary a kuan in, nang tungtawn in midangten vualzawlna a na ngah thei uhi. “Lungsim thawmhau kep ding om uh” tamlua uh, tuate na kepna tungtawn in midangte ading in vualzawlna na suak thei. Pathian hon deihna bang a midangte adia salam leh khalama vualzawlna hi ding in kipan chiatta ni. Tua ding in Toupan hon vualzawl hen.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC