BYF, BDF, BCD Corner | KTZ

BCD TUP LEH NGIM

Baptist Children Department, hunkhat lai a Khristian Naupang Pawl i na chih sek uh, khovel siamsinna skul enton a bawl ahi zenzen kei a, tup leh ngim kichiantak leh chituamtak nei a phuhkhiat ahizaw hi. Tua tup leh ngimte mimal ngaihdan a bawl leng ahisam kei a, Laisiangthou a Toupa Jesu sinsakna mah pansan ngitnget a bawl ahizaw hi. Saptuam Danbu en lehang, Kiphuhkhiakna Dan pek A:29 sung a Tualsung Baptist Children Department genchetna ah hibang in kigelh hi: Tualsung saptuam a naupang kum 18 ching nailoute Laisiangthou sinsakna bang a kithuahkhawm a Pathian be ding, Tanchinhoih puangzak ding leh a gingta mite Khrist nungzui ding a chiil a, nna hoihte sepkhawm ding Naupang pawl mohpuak ahi. Naupang Pawl nasep dingdan genkhiatna hibang in laktom theih hi: EBC Nipini Skul laibute zang in Khrist nungzui bawl in a sinsak ding uh; naupang hotdam nailouhte hotdamna lampi a pi ding; Laisiangthou’ sinsaknate sinsak zel ding.

Tuabang teng ahihman in naupang sinsaktute ading in hamhaih nading om hetlou hi. Naupang pawl leh naupang sinsaktute’ tuppi pen bel naupang mangthang lelte kiang a Tanchinhoih puanzak ding leh hotdamsate Khrist batna a khansak ding ahi hi. Huchi ahihlai in, khatveivei i tup leh ngimte sangmah in, khovel siamsinna skulte paidan etton a neikha i hihkhak ding lauhuai mahmah hi. Sinlaibute i vanzat ahi a, tup leh ngimte sepsuahna dia vanzat khat ahi uhi. Examnate leng naupangte lunglutna ding a sai ahi a, i tup leh ngim ah a tel kei hi. Huchi ahihman in, sinsaktute’n Nipini skulte ah naupangte toh hun i zatkhawmte leh i sinlaibu te, atung a kigelh tup leh ngimte sepsuahna ding in a manpha theipen in i zangzel ding uhi.
Tu kha Sinsaktute’ Laisiangthou suut ding: Matthai 18: 1-14.
Tu kha a BCD Sinsaktute’n “Khristian Sinsakmi” laibu apan sin chiat ding:
SINSAKTU IN A NGIM BULPIPEN DING (Khenpi 2na, pek 4-5)

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC