Articles | KTZ | EBC

Nang Vualzawlna Hi In

Thupatna: Genesis 39:2 ah “Toupa Joseph kiang ah a om” chih i mu. Joseph kiang a om chih in Joseph midangte adia vualzawlna ding in a zang chihna toh kibang ahi. Joseph bang a midangte adia vualzawlna i hih theihna dia poimohte tamlou i kikum ding.

1. Joseph bang a Toupa nang a a om ding ahi: Toupa nang a a om leh, nang a om Toupa ziak a mi’n nang omdan hoih hon mu ding ua, nang hilou, Toupa ziak a midangte adia vualzawlna hiding na hi. A gen siam tawk lechin leng, a thu na zuih keileh midangte adia vualzawlna hithei lou ding na hi. Tehkhinna a i gen sek uh Pastor Ak gu bang lel hiding i hi.

2. Pathian a thuchiam ah diktat hi: Genesis 3:3 ah “Huan laizang-a asia leh apha theihna singgah na ne ding uh ahi kei, na nek uleh na nek ni mahmah un na si ngeingei ding uh” Pathian in a chih, Evi eh Adam in a ne ua, tuni tan in i si uhi. Mathai 5:18 leh Luke 16:17 ah “Dan thu leh a sutvom neu chik hiam thaivom neuchik aman sang in lei leh van amanthat abaihlam zaw” Toupa’n chi eive.

3. Pathian pomtak biak-na om hi: Matthai 6:5-6 a i Hondampa Toupa Jesu mahmah in tangtung a mipite lak a a gen thumdan toh kisai i mu hi. Ding kawm a kisatheitak a thum, a kipahman uh a muta uhi. Anihna ah, Dantan sunggil a lut a, kiniamkhiaktak a thumna, Toupa’n za a din ding, chi hi. Huaiziak in, i thum dan bang leng Toupa deihdan ahi hia, kingaihtuah ni. Eimah thum dan eimah in i theichiat ngal a.

4. Joseph apu Potiphar adia vualzawlna (Genesis 39:2): Joseph kiang a Toupa a om gige ziak, Joseph in Toupa chih dandan mang a, huaiziak a Toupa Joseph kiang a om ahi. A pu Potiphar neih tengteng, Inn leh Gam ah, Joseph ziak in Toupa’n a vualzawl hi. Potiphar ading in Joseph vualzawlna ahi mahmah hi.

5. Joseph tuh Pharo Uain pepa adia vualzawlna (Genesis 40:8-15): Joseph Toupa a a om ziak in bangkim thei Toupa’n Mang hilhchet theihna Joseph a pia a, Pharo uain pepa mang a hilhchian hi. Joseph tuh Pharo Uain pepa adia vualzawlna ahi.

6. Joseph tuh Suangkulh Tangvengpa adia vualzawlna (Genesis 40:20): Joseph zuau a ngoh in om a, Suangkulh a lut in, Toupa toh a lut khawm hi. Suangkulh tangveng heutu in Joseph ah Pathian, bangkim siam leh neitu om ahihdan, a muh ziak in a muang a, a sep ding tengteng Joseph khut ah a nga hi. Joseph in a sep ding teng a sem a, tangveng heutu in a loh ana kilak zel hi. Tangvengpa adi’n Joseph vualzawlna ahi mahmah hi.

7. Joseph tuh Pharo adia vualzawlna (Genesis 41:1-32): Kumpipa Pharo in mang hon nei hi – (1) Bawngpi gawng sagih in Bawngpi thau sagih nekhin. (2) Buhvui sia sagih in Buhvui hoih sagih nekhin. A gamsung a Bumsiam leh Dawi aisansiamte kuaman a hilhchian theikei uhi. Huchi in a Uain pepa’n Joseph hon phawk kheguih hi. Pharo kiang ah a hilh hi. Pharo in Joseph samsak in, a mang gen in, hilhchian sak di’n ngen hi. Genesis 41:16 ah Joseph in “Mang hilhchetna kei a om ahi kei a, Pathian in Pharo lungkimhuaitak in a dawng zoding” chi in dawng hi. Joseph in Pharo mang hilhchian in, Pharo adia vualzawlna thupi mahmah a hong hi hi.

8. Joseph tuh a Unaute leh Inkuante adia vualzawlna (Genesis 42-46): Joseph a mumang ziak a a unaute’n nang phiangsan, Salam kon buk tel ding uhia? chi a mudah a a zuak mang pa uh, Salam bukna ding hun hongtung hi. Toupa’n a theihsak zaw a dik lou leh a kikhel omlou ahi. Genesis 42-46 ah, a Unaute’n buh ngen in Joseph Salam va buk ua, Joseph in buh pawsak in, a Inkuan un Aigupta gam ah pilut hi. Joseph a Unaute leh a Inkuante adia vualzawlna thupitak a hong hi.

Thukhitna: Tukum i thupi uh “Nang vualzawlna hiin” chih Kha teng in thupi tuam in i khennen uhi. A Kha Kha a thupi a “Nang vualzawlna hiin” chih mimal in i diksak zou na uhia? Laisiangthou a kigen peuhmah a diklou omlou ahih man in, ei ut dandan in Pathian be kei ni. Pathian adia theihtawp suah a diang a, hun leh tha tampi seng i kichih lai in, i thasen a thawn ahi kha ding. Sodom khopi humbitna dia midik sawm om zou lou bang in, Pathian ompih leh a thuthu zui midik sawm i om keileh i khopi i humbit zou kei kha ding chih lauhuai lua hi. Pathian ompih leh Pathian thu mang gingtu, midangte adia vualzawlna hi chiat di’n Toupa’n hon ompih gige hen!

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC