General News

Mission toh kisai a Theihsakna

Pathian lalgam kekletna dia lam tuamtuam a i pankhawmnate uh ziak in tuni tan semzom leh masawn zel i hih man un kipahhuai i sa mahmah hi. Pathian’ nna tangzai zaw, chidam zaw leh matal zaw a sep ding ngimna in thil kikhek, puahthak leh patthak bang hong om zel a, tuate tomkim in i kizasak hi.

1. Himalayan Mission Field: Pathian humbitna ziak in Nepal gam ah kum tamtak buaina thupi lua tuaklou in i sem thei ua, Toupa’ min i phat hi. Himahleh sorkar leh paidan kikhek zelte ziak in Nepal gam a sum tamtaktak thotlut pen EBC’ ki register na dan toh kituaklou, tampi mahmah liausak theihna ahi chiin finance expert-ten hon lauh pih uhi. Huaiziak in, Nepal field etkolna pen Bhuttabari, Bagdogra, West Bengal, India apan sai ding leh zazaw uap dia a min “HAMALAYAN MISSION FIELD’ a khek ahi (Vide CEC Rsn.13, 279th Sitting, Apr.11,2018). Field Office Birtamode, Nepal pen Field Sub-Office ahi dia, thuthak om ma Pastor Dilip Kumar Samal in Assistant Field Superintendent (AFS) in July 2018 apan enkai ding hi. Nepal ah ‘Sanatana Dharma’ kichi Hindu gindan kepbitna dia Constitution kikhek Article 26(3) in semtute patau sak hi. Hiai in mi sahkhua khek dia chial leh thilhih kum 5 jail tan theihna leh Rs.5,000/- liau theihna tunkha hi. Thumpihna poimoh mahmah uhi.

2. Partnership thakte: EBC in khuavannuai uap Tangthupha genna (global mission) i tup leh ngim ahih bang in, hiailam a seppih ding pawlpi anuai ate Toupa’n hon pia a, sepkhawmna a hithei tan a pat ngal ahi.

2.1. OMF: Overseas Missionary Fellowship nuai ah Rev Dr Ginnei Thang leh a inkuante’n sawttak a sep nung un Partnership kichian nei ding in MoU suai Feb.9,2016 in CBCNEI, Guwahati a kaih ahi. Tu in Rev N Khaikhuphang leh azi Mrs. Nianggelvung ten Daniel Training Centre, Lopburi, Thailand ah EBC Missionary ding in pau leh tawndan sinna nei lel uhi.

2.2. WEC/IMM: Worldwide Evangelization for Christ/International Mission Mobilization te toh sepkhawmna (MoU) suai November 17, 2017 a kaih ahi. Sepkhawm kipatna ding in a missionary uh Dr. Khamsuanthang Valte August 2018 apan Rs. 20,000/- huhna piak ahi. WEC/IMM’ Missionary Candidate Orientation, 24th September – 30th November 2018 sung Shillong ah om a EBC apan DPC lak candidate thum - 1. Miss Angela Hauzel, EBCC Lamphelpat, Imphal, 2. Miss Zamhoihkim, EBCC Pethuel, Vengnuam South, leh 3. Mr. Thangbiakmuan Naulak, EBCC Central Lamka te tel uhi.

2.3. SIMNEI: Serving In Missions, North East India toh sepkhawmna suai July 27, 2018 a kaih ahi. Amau lak ah ei Saptuam mi Rev. Samuel Lal Guite te inkuan in Dhaka, Bangladesh ah sem lel uhi. EBC in amaute huhna sum Rs.16,000/- i piak sek pen August 2018 apan Rs.40,000/- phaksak ahita.

3. Sikkim: Mission field piching suahsak ding ngimna toh tukum in Evan. Thawnkhanlian leh a zi Evan. Chingkhongai te Jorethang ah i koihbeh ua semtu nga phata uhi. Amaute’n mimal chialpina hahtak in bawl ua, tu in Fellowship mun nih-Takuthang, leh Jorethang ah neih ahita. Takuthang ah gam 0.081 hectare (ie.8,718.76ftsq) a lian Biakin leh semtute omna ding lei dia saifel phial ahita.

4. Missions Thumna: February 4, 2018 apan Missions ading liauliau a Missions Thumna i pat uh thum mite chihtakna ziak in paihoih zel a, a kuan lam leh sawltu lam adia thangahna ahih man in manpha i sa mahmah hi. Hiai thumna pen hun dang leh nidang a missions thumnate khekkhiakna hilou ahi chih i kitheisak thakthak hi. Hiai nite adia thumna point kihawmte ban ah hihdan hoih leh poimoh i sak bangbang a sai in a manpha theipen in zang le’ng i chi hi.

Mission nasep doudalna ding in Setan in zat moh neilou hi. Ginglou mite kia hilou gingtute ban ah a semtute mahmah zong a vanzat hikha sek ahih man un thumna leh thilpiak ban ah hihtheih lamlam a phungvuh leh panpih kisam mahmah hi. Laphuaktu in “Khristiante aw, thou in hatna gawmkhawm un; Khelhna khau sut di’n Gospel thu gen un” a chih bang a pangkhawm ding in Toupa’n hon ompih chiat hen.

-Director of Missions

 

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC